ރައީސް ނަޝީދުގެ ބޭބެ ޑރ އިބްރާހީމް ނާޝިދު ވަނީ ރައީސް ނަޝީދަށް ލިބިވަޑައިގެންނެވި އަނިޔާތަކުގެ ފޮޓޯ ޓްވީޓް ކުރައްވާފައެވެ.  މިފޮޓޯތަކަށް ބަލައިލުމުން ރައީސް ނަޝީދުގެ ހަށިކޮޅަށް ބޮޑެތި އަނިޔާތަކެއް ލިބިފައިވާކަން އެނގެއެވެ. . އަދި ބަނޑުފުޅާ ދިމާލުން ވަރަށް ބޮޑަށް ކެފުމަށްފަހު ފަހާފައިވާތަންވެސް ފެނެއެވެ. ނާޝިދުވަނީ މިއީ ރައީސް ނަޝީދުގެ އެދިލެއްވުމަކަށް ހިއްސާކުރެއްވި ފޮޓޯތަކެއް ކަމަށް ވިދާޅުވެފައެވެ.

ރައީސް ނަޝީދަށް މިހަމަލާގައި ލިބިވަޑައިގެންނެވި އަނިޔާތަކަށް އިތުރު ފަރުވާއަށް މިވަގުތު ދަނީ ޖަރުމަން ވިލާތުގައި ފަރުވާ ހޯއްދަވަމުންނެވެ.

ރައީސް ނަޝީދުގެ ހާލުކޮޅު މިހާރު ރަނގަޅުވަމުން އަންނައިރު، ހަމަލާއާއި ގުޅިގެން އެމަނިކުފާނުގެ ފުރާނަ ސަލާމަތް ކުރެވުނީ ކިރިޔާކަމަށް ޑޮކްޓަރުންގެ ޓީމުން ވިދާޅުވެފައިވެއެވެ.

ރައީސް ނަޝީދުގެ ދަތުރުފުޅުގެ ހުރިހާ އިންތިޒާމެއް ހަމަޖައްސާފައިވަނީ މިނިސްޓްރީ އޮފް ފޮރިން އެފެއާޒްއާއި ޖަރުމަނުވިލާތުގައި ހުންނަ ރާއްޖޭގެ އެންބަސީ މެދުވެރިކޮށް ޖަރުމަނުގެ ސަރުކާރުން ކަމަށް ރައްޔިތުންގެ މަޖިލީހުން ވަނީ ބުނެފައެވެ.